A todos. A todas.... Gracias.

Por estardes aí apoiándonos....
Por traballar canda nós....
Por querer que traballemos por ti...
Por darnos azos para seguir loitando....
Por rachar co pasado....
Por ser como sodes....
Por crer que pode haber un San Sadurniño mellor....
Por confiar no BNG e na súa xente, na túa xente....
Por asumir que o voto é unha responsabilidade...
Por dicir nas urnas que era tempo de cambio....
Por abrirnos a vosa porta....
Por abrirnos o voso corazón....

Os vosos amigos e amigas do BNG

O BNG gáñalle dous concelleiros ao PP e queda a escasos votos de ser a forza máis votada.
(pica na imaxe para ver a gráfica ampliada)

Editorial

Estamos de noraboa. despois de moitos anos agardando por un polígono industrial este será unha realidade froito do traballo realizado polos concelleiros do BNG.

Desde que se deu o cambio de goberno na Xunta mantivemos múltiples xuntanzas cos responsables das consellarías de Industria, Vivenda e Vicepresidencia, conseguindo que tomaran con moito interese esta vella aspiración.

Fomos capaces, estando na oposición, de realizar as xestións necesarias para resolver unha das principais necesidades que ten o concello. Demostramos en só dous anos, coincidindo coa chegada do BNG ao goberno da Xunta, a nosa capacidade de xestión. Un goberno municipal, ademais de ter ideas, ten que ser capaz de levalas a cabo.

O BNG de San Sadurniño ten un programa de goberno no que o benestar social é un obxectivo preferente e no que se recollen as principais necesidades do concello:

• Creación de postos de traballo.
• Promoción económica para impulsar o desenvolvemento local.
• Urbanismo e ordenación do territorio.
• A vivenda como ben social.
• Asistencia aos nosos maiores.
• Atención á mocidade – formación, ocio, novas tecnoloxías, etc.-
• Conservación do patrimonio e potenciación do turismo.
• Transparencia na xestión impulsando a participación veciñal na vida municipal.

O BNG conta con xente capacitada para poder colocar a San Sadurniño no lugar que lle corresponde. Contamos co apoio de moitos veciños e veciñas que están ilusionados co cambio que se aveciña. Contamos co apoio da Xunta de Galicia e da Deputación.

Non se pode deixar escapar esta oportunidade histórica: un cambio no goberno municipal facilitará o despegue definitivo do noso concello.

Entrevista a Luis Barcia

Xosé Luis Barcia, (Moeche 1955) vinculado a San Sadurniño por razóns familiares, é o Delegado Provincial da Consellería de Innovación e Industria e Presidente de XESTUR-A Coruña (Sociedade Pública adicada á construcción de Solo Industrial e Solo Residencial) entidade que está impulsando a construcción do Parque Empresarial de San Sadurniño.

¿Cómo xurde a idea de construir un Parque Empresarial en San Sadurniño?

- Nada mais chegar ao goberno, o BNG de San Sadurniño tíñame manifestado a necesidade de dar cumprimento a unha vella aspiración local de dispoñer desta infraestructura fundamental para o desenvolvemento económico e o emprego do seu Concello. Desde aquela tivemos varias reunións nas que lles informei dos pasos que se ian dando.

¿Qué xestións fixo Vde. como Delegado da Consellería para que o polígono sexa unha realidade?

- A primeira de todas foi facer partícipe desta proposta á Conselleira de Vivenda e ao seu equipo, por ser a quen lle corresponde tomar a decisión, tamén ao Conselleiro de Innovación e Industria para incorporar esta iniciativa ao programa “Galiza Suma”, que, promovido polo Vicepresidente da Xunta Anxo Quintana, ten previsto dotar a Galiza de 20 millóns de m² de Solo Empresarial de alta calidade. Unha vez que a Conselleira Teresa Táboas deu a conformidade, iniciáronse as xestións por parte de XESTUR.

¿Cales son as etapas e os prazos para a execución do Parque Empresarial?

- Estamos na fase inicial, que é a de poñer de acordo ás partes, esta fase rematará coa sinatura dun convenio que vincule á Consellería de Vivenda, XESTUR, Concello e empresas. Posteriormente hai que redactar o proxecto de urbanización, adquirir os terreos, e inicar a execución das obras. Se todas as partes colaboran e non hai dificultades imprevistas a finais de ano poderíamos estar en condicións de iniciar as obras.

¿Como encaixa este parque empresarial dentro da Política de Promoción Industrial do BNG?

- Encaixa perfectamente, a política de desenvolvemento industrial deste goberno pasa por poñer ao sevizo dos emprendedores solo industrial suficiente, de alta calidade e con todos os servizos. Neste contexto, este parque reune todas as características para ser un enclave significativo da nosa política industrial: hai recursos susceptibles de transformar industrialmente, hai personal altamente cualificado, hai centros tecnolóxicos e universitarios no entorno e o que é máis importante, hai persoas e empresas dispostas a promover importantes proxectos empresariais.

O PP de San Sadurniño dende o ano 1991 ven prometendo a construcción dun polígono industrial, especialmente antes das eleccións municipais. ¿ten constancia de que o Goberno Municipal presidido por Constantiño Bedoya tivese feito algunha xestión para conseguilo?

- Non me compete a mín entrar a xuzgar os comportamentos políticos do Alcalde de San Sadurniño no exercicio das súas funcións, en todo caso esa labor correspóndelle aos seus veciños e proximamente teran esa oportunidade. O que si poido dicir, é que desde que temos responsabilidades de Goberno na Xunta de Galicia, a nós so se dirixiu o Grupo do BNG de San Sadurniño con Secundino García ao frente.

A Consellería de Cultura incrementa en 120.000 euros o proxecto de consolidación do castelo de Naraío

Ánxela Bugallo visitou o castelo de Naraío, invitada polos concelleiros do BNG, onde anunciou un novo investimento para continuar coas obras de limpeza e consolidación. Con esta nova aportación a inversión total aproxímase aos 280.000 euros para un proxecto co que se trata de poñer en valor esta fortaleza.

A presenza de Ánxela Bugallo na fortaleza resultou interesante, xa que na mesma anunciou unha nova inversión neste castelo que durante tantos anos estivo esquecido das autoridades e que agora se trata de poñer en valor como patrimonio de todos, de veciños e visitantes. A nova intervención consistirá na continuación das labores de consolidación dos muros e das estruturas, así como a retirada de terras que ocultaban o perímetro do castelo.

As xestións realizadas polo BNG deron de novo os seus froitos, xa o anunciábamos hai dous meses e agora confirmase. Para Manolo Varela, “esta é unha boa nova para San Sadurniño, desde que comezaron as obras son moitos os visitantes que se achegan desde tódolos puntos da comarca e moitos os veciños que ven renacer un patrimonio que forma parte da súa historia”.

En clave política Varela resaltou que “o noso concello debe sumarse as novas tendencias no relacionado co turismo, sentando as bases para estar a altura das circunstancias e tomando medidas que fagan de San Sadurniño un lugar a ter en conta dentro do contexto turístico comarcal”.

A Deputación concédelle 216.000 € ao Concello para infraestruturas

Nunha visita do Alcalde, acompañado do portavoz do BNG, ao Vicepresidente da Deputación, Bedoya recoñeceu que o actual depósito de auga é insuficiente e esta mal situado, sen embargo pensa gastar estes cartos nunhas gradas no campo de fútbol de Corrás.

O Concello de San Sadurniño dispón dunha partida económica adicional de 216.347 € (36.000.000 Pts.) para investimentos, procedentes dun novo Plan de Cooperación Local. Este acordo adoptouse no Pleno da Deputación celebrado o pasado 29 de marzo.

O Concello tiña de prazo ata o día 30 de abril para concretar en que actuacións se gastará esta cantidade. Nunha nota de prensa o Alcalde xa adiantou, sen ter en conta o criterio da Corporación Municipal, que pretendía gastar esa cantidade na construción dunhas gradas no campo de fútbol municipal de Corrás. Incluso manifestou que se esa cantidade era insuficiente gastaría parte do crédito de 300.000 € que o concello solicitou en Caixa Galicia.

O BNG propuxo, no Pleno do mes de marzo, que esa cantidade se destinara integramente a garantir o abastecemento de auga ás zonas da capitalidade municipal que se atopan en cotas máis altas que o depósito, como as partes altas de Corrás e Outeiro. Hai que ter en conta que o actual depósito nin ten capacidade suficiente nin está ben situado, tal e como recoñeceu Bedoya nunha visita, acompañado do portavoz do BNG, ao Vicepresidente da Deputación, polo que con esta cantidade se podería construír un novo depósito que solucionaría estes problemas definitivamente. Desta maneira poderíase seguir estendendo este servizo público ao resto dos lugares do concello.

O BNG defendeu no Pleno celebrado o pasado 30 de abril que os cartos se destinen a servizos básicos como o abastecemento de auga. Porén, a agrupación nacionalista deixou claro que non se opón a que se fagan melloras nas instalación deportivas "pero os recursos públicos hainos que priorizar e, a día de hoxe, consideramos moito máis urxente que a xente teña garantido o abastecemento de auga que gastar 36.000.000 de pesetas as bancadas dun campo de fútbol", dixo Secundino García.

O BNG presenta a súa candidatura encabezada por Secundino García Casal

O pasado 10 de abril máis de 150 persoas asistiron a este acto, no que ademais do candidato a alcalde, presentouse a totalidade da lista electoral

O BNG de San Sadurniño contou, neste acto de presentación, co apoio da responsable de comunicación da executiva do BNG, dos delegados provinciais de Vicepresidencia e Industria así como o do Conselleiro de Industria. Este conselleiro afirmou que “a creación do polígono industrial será vital para o despegue definitivo deste concello” e asegurou que “foi o BNG local e ninguén máis os que desde un primeiro momento nada máis tomar posesión o novo goberno galego puxéronme encima da mesa esta vella aspiración do pobo de San Sadurniño”. A Delegada de Vicepresidencia, Tareixa Novo, confirmou neste acto que “a residencia da terceira idade será unha realidade cun goberno do BNG no municipio”

“Hoxe é o primeiro día do verdadeiro cambio político que se vai completar este 27 de maio. Cando o BNG gañe a alcaldía, vaina gañar o pobo de San Sadurniño, e imos traballar en estreita conexión cos veciños e veciñas para saír do estancamento no que nos ten sumido o PP, convertendo o concello nun instrumento na mellora da calidade de vida, e na conquista do benestar e da igualdade”, afirmou Secundino García no acto de presentación da candidatura, que xuntou a máis de 150 persoas no mesón A Granxa o pasado 10 de abril.

O conselleiro de Innovación e Industria presentou ao candidato

O candidato nacionalista destacou que “un bo goberno municipal ademais de preocuparse polos pequenos problemas cotiás que afectan á calidade de vida das persoas, como o bo estado da rede viaria municipal, a recollida do lixo ou o correcto funcionamento dos alumeados públicos, ten que ter moi claro cal é o modelo de concello que quere xa que diso depende toda a planificación da política municipal.”

Tamén fixo un repaso detallado das propostas do BNG para os vindeiros catro anos, nos que destacou como prioridades a construción dun polígono industrial que permita crear postos de traballo, a recuperación para uso social do antigo pazo da marquesa que será destinado a un centro para a atención á terceira idade e habilitar solo público en todas as parroquias co fin de que ninguén teña que abandonar o lugar onde naceu por carecer dun solar donde construir a súa vivenda.

O BNG ten o apoio total da Xunta para que San Sadurniño conte cun polígono industrial e un centro da terceira idade

O Vicepresidente da Xunta e a Conselleira de Vivenda apostan polo equipo encabezado por Secundino García para gobernar San Sadurniño.

O pasado 13 de abril celebrouse un acto no que o Vicepresidente da Xunta e a Conselleira de Vivenda, apoiaron ao candidato do BNG á alcaldía de San Sadurniño, Secundino García. Este acto contou ademais coa presenza dos Delegados Provinciais de Industria, Luis Barcia, e Vivenda, Xoan Carlos Bascuas.

O vicepresidente manifestou o incondicional apoio da Xunta para levar adiante todos os proxectos que o BNG ten pensados para San Sadurniño, entre os que destacan o polígono industrial e o centro para a terceira edade no Pazo da Marquesa.

Anxo Quintana dixo que San Sadurniño "precisa dun goberno serio, responsable e colaborador coas institucións; e non un goberno que pon trabas, escusas e críticas a todas as iniciativas da Xunta, tal e como fai, desde hai tempo o PP de San Sadurniño".

O Vicepresidente pediu aos veciños que non perdan a oportunidade histórica de ter un goberno útil e eficaz cun alcalde á cabeza, Secundino García, que vai liderar un novo proxecto para este Concello. Anxo Quintana destacou do candidato a súa capacidade, entrega e ilusión, e definiuno como unha persoa dialogante e aberta á xente.

O BNG preséntase a estas eleccións municipais "coa satisfacción de ter traballado activamente nos últimos anos por e para San Sadurniño e co convencemento de que o pobo valorará o seu esforzo e entrega", tal e como asegurou Secundino García. O candidato do BNG á alcaldía engadiu que "cada vez son máis os veciños e veciñas que queren un cambio e ese cambio real só se pode conseguir co BNG no goberno do Concello".